Las cusseglieras ed ils cussegliers federals han ina funcziun dubla. Els èn commembers da la regenza ed èn uschia – sco collegi – responsabels cuminaivlamain per l'activitad guvernativa. Ma els mainan er in departament e represchentan quest departament en il collegi.
Il Cussegl federal maina l'administraziun federala cun sias var 38'000 emploiadas ed emploiads. Sco collegi ha el la responsabladad suprema per las funcziuns guvernamentalas. Tras ina surveglianza permanenta e sistematica procura el ch'ils departaments ed uffizis realiseschian lur incumbensas tenor las prescripziuns giuridicas.
En quai che reguarda las finanzas federalas vegn il Cussegl federal sustegnì da la Controlla federala da finanzas. Quella è independenta ed è suttamessa mo a la Constituziun ed a la lescha.
Set departaments ed ina chanzlia
L'administraziun federala è dividida en set departaments. Mintga departament vegn manà d'ina cussegliera federala u d'in cusseglier federal. La substituziun vegn reglada dal Cussegl federal. Vitiers vegn la Chanzlia federala sco post da stab da la regenza.
Las finamiras, ils champs d'activitad e la structura, ma er ils princips d'agir dals departaments e da la Chanzlia federala èn reglads en las ordinaziuns d'organisaziun. Questas ordinaziuns vegnan decretadas dal Cussegl federal.
Dretg illimità da dar directivas e da far controllas
Las scheffas ed ils schefs dals departaments han la responsabladad politica per la gestiun da lur departament. Per quest intent han els da princip dretgs illimitads da dar directivas, da far controllas e d'intervegnir persunalmain.
Elecziun da las scheffuncziunarias e dals scheffuncziunaris
Sia responsabladad generala per l'administraziun federala ademplescha il Cussegl federal er tras quai ch'el sez – e betg ils schefs dals departaments – elegia ils directurs dals uffizis. Er ils secretaris da stadi, il schef da l'armament, il directur da la Controlla da finanzas ed autras persunas da cader vegnan elegidas dal Cussegl federal.
A favur dal dretg e dal bainstar general
En il rom da lur activitad ston il Cussegl federal sco er las emploiadas ed ils emploiads da la Confederaziun observar tscherts princips generals. Quels èn fixads en la Lescha davart l'organisaziun da la regenza e da l'administraziun e prescrivan il suandant:
- Il Cussegl federal e l'administraziun federala ageschan sin basa da la Constituziun e da la lescha.
- Els s'engaschan per il bainstar general, defendan ils dretgs dals burgais sco er las cumpetenzas dals chantuns e promovan la collavuraziun tranter la Confederaziun ed ils chantuns.
- Els ageschan tenor ils princips da l'opportunitad e da la rentabilitad.
Departaments
- Departament da defensiun, protecziun da la populaziun e sport (DDPS)
- Departament da l'intern (DFI)
- Departament per ambient, traffic, energia e communicaziun (DATEC)
- Departament d'economia, furmaziun e retschertga (DEFR)
- Departament da giustia e polizia (DFGP)
- Departament da finanzas (DFF)
- Departament federal d'affars exteriurs (DFAE)
Ultima midada 15.06.2023
