L'incumbensa la pli impurtanta dal Cussegl federal è il reger. El giuditgescha cuntinuadamain la situaziun, fixescha las finamiras ed il meds finanzials da l'agir statal, maina la realisaziun e represchenta la Confederaziun vers anen ed anora.
Las cusseglieras federalas ed ils cussegliers federals han ina funcziun dubla. Ellas ed els èn commembers da la regenza ed èn uschia – sco collegi – responsa-bels cuminaivlamain per l'activitad guvernativa.
Manar vul dir decider. Onn per onn tracta il Cussegl federal circa 2'500 fatschentas. Per gronda part sa tracti dad infurmaziuns e da projects per mauns dal parlament. Decidì vegni a chaschun da las sesidas dal Cussegl federal.
La planisaziun strategica e la valitaziun da la situaziun han ina gronda impurtanza per il Cussegl federal. El controllescha er, sche las incumbensas èn vegnidas ademplidas e sche las finamiras èn vegnidas cuntanschidas.
La publicitad è exclusa da las sesidas dal Cussegl federal. Ma suenter mintga sesida infurmescha il Cussegl federal detagliadamain davart sias decisiuns.
Salari, pensiun, vehichels da lavur, viadis e.u.v. Qua vegnis Vus a savair dapli davart ils dretgs e las obligaziuns da cusseglieras e cussegliers federals en uffizi ed en pensiun.
