Davart il Cussegl federal
Il Cussegl federal regna la Svizra. Ina u in da ses set commembers surpiglia mintg’onn l’uffizi da la presidenta u dal president da la Confederaziun e represchenta la Svizra a chaschun da differentas occurrenzas. Il Cussegl federal exista dapi l’onn 1848.
Las set commembras e commembers dal Cussegl federal
La regenza svizra consista da las set commembras e commembers dal Cussegl federal. La presidenta u il president da la Confederaziun è elegì mo per in onn e vala durant quest temp sco «primus inter pares», quai vul dir sco emprim tranter talas e tals da medema posiziun.
Presidi da la Confederaziun
En ses onn d'uffizi ha il president da la Confederaziun incumbensas spezialas. Quai vala tant per la collavuraziun entaifer la regenza sco er per la represchentaziun vers anora.
Las incumbensas
Il Cussegl federal dirigia la Svizra, maina l'administraziun, propona leschas ed exequescha quellas. El sa raduna mintga emna ed infurmescha davart sias decisiuns.
Elecziun dal Cussegl federal, lieus da lavur e salaris
Las commembras ed ils commembers dal Cussegl federal vegnan elegids dal parlament per quatter onns. Mintga commembra e mintga commember survegn in salari cleramain definì e lavura en il departament ch’ella u el maina. Il Cussegl federal sa scuntra ina giada l’emna per ina sesida en la Chasa federala a Berna.
Fotografias e pleds
Il Cussegl federal represchenta la Svizra a chaschun da differentas occurrenzas en Svizra ed a l’exteriur. Questa pagina dat access a maletgs uffizials, pleds ed allocuziuns da las commembras e dals commembers dal Cussegl federal.
Istorgia dal Cussegl federal
L'onn 1848, cun acceptar la Constituziun federala, è la Svizra daventada in stadi federal modern. Ils chantuns avevan ussa ina regenza federala ed in parlament federal sur sai. L'emprima Assamblea federala è sa radunada il november 1848, ha tschernì l'emprim Cussegl federal ed ha fixà Berna sco sedia dal Parlament federal.