Chancelier da la Confederaziun Viktor Rossi

Viktor Rossi, Bundeskanzler seit dem 1. Januar 2024.

Viktor Rossi, chancelier da la Confederaziun, è il schef da stab dal Cussegl federal. El sustegna la presidenta u il president da la Confederaziun ed il Cussegl federal en la realisaziun da lur incumbensas. Cun ils dus vicechanceliers participescha el a las sesidas emnilas dal Cussegl federal en las qualas el ha ina vusch consultativa e dastga er far propostas.

Viktor Rossi è naschì l'onn 1968. Suenter ses emprendissadi da cuschinier ha el fatg la maturitad gimnasiala ed ha absolvì il studi da magister per economia e dretg a l'Universitad da Berna. Ultra da furmaziuns supplementaras en il management da direcziun, da projects e da process ha el fatg l'onn 2015 in Diploma of Advanced Studies in Law.

Viktor Rossi è stà durant 11 onns directur da l'interpresa da furmaziun commerziala «Bildung Formation Biel-Bienne (BFB)». Durant quest temp è el stà vicepresident e secretari da la Conferenza da las scolas professiunalas spezialisadas e da la Conferenza da las scolas spezialisadas superiuras dal chantun Berna sco er president da la Conferenza dals recturs commerzials dal chantun Berna.

A partir da l'onn 2010 ha el manà la Secziun gestiun da las fatschentas e logistica da la Chanzlia federala. Dapi l'onn 2015 è el stà incumbensà dal chancelier federal sco incumbensader dal project-clav dad ICT GENOVA (introducziun da la gestiun da las fatschentas/soluziun da standard GEVER per l'administraziun federala centrala). Dapi l'onn 2019 è Viktor Rossi stà vicechancelier ed ha manà il Sectur Cussegl federal. 

Viktor Rossi è maridà ed ha duas figlias creschidas. El è burgais dubel italo-svizzer.

https://www.bk.admin.ch/content/bk/rm/home/bk/bundeskanzler.html