Incumbensas da la Chanzlia federala

Sco post da stab dal Cussegl federal organisescha la Chanzlia federala las sesidas da la regenza ed infurmescha davart ils conclus. Ella publitgescha ils texts uffizials e garantescha ch’ins possia far diever dals dretgs politics e che las elecziuns e votaziuns federalas vegnian realisadas en moda correcta.

La Chanzlia federala prepara las sesidas dal Cussegl federal. Per onn vegnan tractadas 2500 fatschentas. Il salter da la Chanzlia federala depona actas en la stanza dal Cussegl federal.

Tranter il Cussegl naziunal, l’administraziun, il parlament e la populaziun

La Chanzlia federala (ChF) è il post da stab dal Cussegl federal e funcziuna sco scharnier tranter la regenza, l’administraziun, l’Assamblea federala e la publicitad. Ella prepara ed evaluescha las sesidas dal Cussegl federal. Plinavant coordinescha ella l’infurmaziuns da las medias e da la publicitad davart ils conclus e las posiziuns da la regenza. La Chanzlia federala garantescha er che las burgaisas ed ils burgais possian far diever da lur dretgs politics e che las elecziuns e votaziuns federalas vegnian realisadas en moda correcta. Ella edescha publicaziuns uffizialas, presta/metta a disposiziun servetschs linguistics e gioga ina rolla centrala en la transfurmaziun digitala da l’administraziun federala.

Communicaziun da la regenza

La Chanzlia federala coordinescha la communicaziun da la Confederaziun cun las medias, la publicitad, ils chantuns ed il parlament. En coordinaziun cun ils departaments procura ella ch'il Cussegl federal infurmeschia a temp sco er en moda unitara, cuntinuada e cumplessiva davart sias activitads e davart ses conclus. Il pledader dal Cussegl federal e vicechancelier André Simonazzi maina la conferenza da medias suenter la emnila dal Cussegl federal.  

Dretgs politics

Las Svizras ed ils Svizzers han dretgs politics che tanschan zunt lunsch. Els pon lantschar e/u suttascriver iniziativas e referendums. Trais fin quatter giadas per onn pon els votar davart dumondas politicas e mintga 4 onns elegian els las commembras ed ils commembers dal Cussegl naziunal. En la gronda part dals chantuns han lieu a medem temp las elecziuns dal Cussegl dals chantuns. La Chanzlia federala infurmescha la populaziun davart ils dretgs politics en general e davart ils cuntegns da projects da votaziun federals en spezial. Ella procura che las votaziuns federalas hajan lieu senza incaps e publitgescha ils resultats da questas votaziuns.

 

Publicaziuns uffizialas

En consentiment cun ils departaments ch'èn mintgamai cumpetents en chaussa è la Chanzlia federala responsabla per las explicaziuns dal Cussegl federal avant las votaziuns federalas. Ella publitgescha plinavant ils texts giuridics, il Fegl uffizial federal ed autras publicaziuns uffizialas. Cun broschuras sco "La Confederaziun en furma concisa" sco er cun differentas paginas d'internet infurmescha la Chanzlia federala la publicitad davart il sistem statal svizzer.

Transfurmaziun digitala

Dapi il cumenzament da l’onn 2021 è il sectur Transfurmaziun digitala e direcziun da las TIC (TDT) affilià a la Chanzlia federala. Sia incumbensa èsi da far avanzar – en collavuraziun cun ils departaments – la transfurmaziun digitala da l’administraziun federala e da garantir la direcziun da las TIC.

Cifras pertutgant la Chanzlia federala

Plazzas a temp cumplain (2021): 283

Tenor il preventiv quinta la Chanzlia federala per l'onn 2021 cun custs da 127 milliuns francs.

Ultima midada 26.04.2023

Tar il cumenzament da la pagina

La chanzlia federala online

Homepage

https://www.admin.ch/content/gov/rm/pagina-iniziala/chanzlia-federala/aufgaben-der-bundeskanzlei.html