Cun www.admin.ch avais Vus tschernì precis la dretga pagina per obtegnair tut las infurmaziuns davart las autoritads federalas svizras e davart lur funcziuns. Da qua davent arrivais Vus directamain tar ils set departaments e tar lur uffizis, tar la Chanzlia federala, tar il parlament sco er tar ils tribunals suprems.

L'infurmaziun e la communicaziun èn incumbensas centralas da la regenza e da l'administraziun. Las burgaisas ed ils burgais han il dretg da survegnir infurmaziuns generalas ed actualas da las autoritads. Per quest intent duvrain nus meds da communicaziun moderns ed empruvain nus d'esser adina actuals.

Insatge As vegn segiramain a dar en egl immediat sin nossas paginas: la plurilinguitad. La Svizra reunescha las quatter linguas naziunalas tudestg, franzos, talian e rumantsch. La cuminanza è in element impurtant da la varietad culturala da noss pajais. Correspundentamain èn nossas purschidas en l'internet almain trilinguas e per part schizunt en tschintg linguas; tschertas infurmaziuns stattan a disposiziun er per rumantsch e per englais.

Cumenzai ussa Vossa tura explorativa persunala sin www.admin.ch. Vus vegnis a chattar bleras chaussas interessantas! Sche Vus avessas anc dumondas u remartgas, contactai noss webmaster (rubrica contact). Nus empruvain d'As respunder uschè spert sco pussaivel.

Bun divertiment ed in vent amiaivel cun navigar tras nossa rait!

Corina Casanova
chanceliera federala