Retschertga textuala integrala

Entschatta dals cuntegns

Entschatta dal navigatur

Fin dal navigatur



Co ch'in chant da baselgia daventa in imni naziunal

Stad 1841. Il spiritual Alberik Zwyssig (1808-1854) sa chatta tar ses frar sin iil bain son Carli, ina imposanta chasa patriziana dador las portas da Zug. Ses enconuschent turitgais Leonhard Widmer (1809-1867), in editur da musicalias, schurnalist e poet da chanzuns al trametta in text patriotic per laschar cumponer ina chanzun. El elegia il chant cultic per il psalm "Diligam te Domine" (Jau vuless ta charezzar, Signur) ch'el aveva cumponì 1835 per in'installaziun sacerdotala, cura ch'el era dirigent da musica da la claustra da Wettingen. "La saira da sontga Cecilia, glindesdi, ils 22 da november 1841, en l'emprima auzada dal bain son Carli, en la stiva vers il lai e la citad" prova Zwyssig per l'emprima giada ses "psalm svizzer" cun quatter burgais da Zug.

Gia dus onns pli tard cumpara la nova chanzun patriotica en il "Cudesch festiv da la Zofingia da Turitg (la pli veglia associaziun studentica svizra) a chaschun da la festivitad per la recepziun da Turitg en la Lia svizra, 1. da matg 1351 : 1. da matg 1843". Il medem onn è la chanzun vegnida chantada a la festa federala da chant a Turitg cun grond resun tar il public. Chors virils han acceptà fitg spert il psalm svizzer, sin fundament da traducziuns er en las regiuns latinas, ed el ha embellì savens festas patrioticas. Las numerusas propostas tranter 1894 e 1953 da far declerar questa chanzun sco imni naziunal uffizial valaivel ha il cussegl federal adina snegà cun l'argument ch'ins na possia betg introducir in imni naziunal entras in decret guvernamental, mabain ch'il pievel al stoppia eleger libramain, al chantond regularmain. En realitad existeva sco chant uffizial represchentativ per acts politics e militars in'autra chanzun ch'era gist uschè populara sco il "psalm svizzer": "Clomas, o patria" è segiramain anc en la memorgia a blers. Il text vegniva chantà cun la melodia da l'imni englais "God save the King (Queen)". Durant il 20avel tschientaner, cura ch'ils contacts internaziunals èn sa multiplitgads, ha quai chaschunà mintgatant situaziuns peniblas, sch'ins sunava il medem imni naziunal per l'Engalterra e per la Svizra.

Perquai ha il cussegl federal decidì 1961 ch'il psalm svizzer, ina creaziun incumparabla e dal tuttafatg svizra, duaja valair provisoricamain sco imni naziunal uffizial svizzer. Suenter in temp da prova da trais onns èn 12 chantuns s'exprimids en favur dal "psalm svizzer", entant che set vulevan prolungar il temp da prova e betg main che sis chantuns han renvià la chanzun sco simbol statal. Malgrà il resultat ambiavalent è il psalm svizzer vegnì confermà 1965 provisoriamain sco imni naziunal, ma questa giada illimità. Il provisori ha il cussegl federal laschà crudar pir 10 onns pli tard, dentant senza excluder ina nova decisiun per pli tard. Suenter èn anc vegnidas inoltradas a Berna pliras propostas per in nov chant naziunal. Il "psalm svizzer" è restà enavant senza concurrenza, damai che nagin'autra cumposiziun ha pudì reunir tantas vuschs. Perquai ha il cussegl federal finalmain declerà l'emprim d'avrigl 1981 il "psalm svier" senza resalva sco imni naziunal da la Confederaziun, e quai cun l'argumentaziun ch'i sa tractia "d'ina chanzun purmain svizra, degna e festiva, sco quai che la pluralitad da nossas conburgaisas e noss comburgais giavischia in imni naziunal".
(Text: Cumissiun da coordinaziun per la preschientscha da la Svizra a l'exteriur.)
Turnar tar la survista Imni naziunal svizzer

Fin dals cuntegns



http://www.admin.ch/org/polit/00055/00064/index.html?lang=rm