Il Tribunal federal è il tribunal suprem da la Svizra. El represchenta dasper l’Assamblea federala (la legislativa) ed il Cussegl federal (l’executiva) la pussanza giudiziala (la giudicativa). En la sedia principala a Losanna lavuran las duas secziuns da dretg public, las duas secziuns da dretg civil e la secziun da dretg penal. Las duas secziuns da dretg social sa chattan a Lucerna.

Suenter la refurma da la giustia l’onn 2000 èn vegnids furmads trais novs tribunals d’emprim’instanza: il Tribunal penal federal cun la sedia a Bellinzona; il Tribunal administrativ federal cun la sedia a Son Gagl ed il Tribunal federal da patentas che ha medemamain sia sedia a Son Gagl.