|
|
|
|
L'assamblea federala da la Confederaziun svizra,
sa basond sin l'artitgel 85 cifra 1 da la constituziun federala,
avend gì invista dal messadi da cussegl federal dals 20 d'october
19931),
concluda:
1 Il cussegl federal è la pli suprema autoritad directiva ed executiva da la Confede- raziun.
2 El consista da set commembers.
3 El vegn sustegnì dal chancelier federal u da la chanceliera federala.
Ils commembers dal cussegl federal vegnan sustegnids da secretaris e secretarias dal stadi.
1 L'administraziun federala è suttamessa al cussegl federal. Ella cumpiglia ils departaments e la chanzlia federala.
2 Ils singuls departaments sa dividan en gruppas ed uffizis. Els disponan mintgamai d'in secretari general.
3 A l'administraziun federala appartegnan plinavant unitads da l'administraziun decentralisadas tenor las mesiras da lur decrets organisatoris.
4 Tras la legislaziun federala san organisaziuns e persunas dal dretg public u privat, che n'appartegnan betg a l'administraziun federala, vegnir incumbensadas cun pensums administativs.
1 Cussegl federal ed administraziun federala ageschan tenor la basa fixada en la constituziun ed en las leschas.
2 Els s'engaschan per il bainstar general, mantegnan ils dretgs dals burgais e da las burgaisas sco er las cumpetenzas dals chantuns e promovan la collavuraziun tranter confederaziun e chantuns.
3 Els ageschan tenor princips funcziunals e raziunals.
Il cussegl federal è sco collegi responsabel per l'observaziun e l'adempliment da las funcziuns guvernamentalas.
Il cussegl federal examinescha regularmain ils pensums da la confederaziun e lur adempliment sco er l'organisaziun da l'administraziun federala concernent lur necessitad e lur concordanza cun las finamiras che resultan da la constituziun e da las leschas. El sviluppa schliaziuns per l'agir dal stadi ch'èn orientadas vers l'avegnir.
1 Il cussegl federal fixescha las finamiras ed ils meds da sia politica guvernamentala.
2 El dat la preferenza a l'adempliment da las incumbensas guvernamentalas.
3 El prenda tuttas mesiras per garantir da tut temp l'activitad guvernamentala.
4 El dat tutta fadia per mantegnair l'unitad e la solidaritad dal pajais e promova latiers la multifariadad federalistica. El presta ina contribuziun per ch'ils auters organs dal stadi possian ademplir lur pensums confurm a la constituziun ed a las leschas a moda cunvegnenta ed actuala.
Cun la resalva dal dretg d'iniziativa dal parlament dirigia il cussegl federal la procedura da la legislaziun. El preschenta a l'assamblea federala sbozs per midadas da la constituziun, per leschas federalas e conclus federals e relascha las ordinaziuns, uschenavant ch'el ha la cumpetenza latiers tras la constituziun u tras la lescha.
1 Il cussegl federal fixescha l'organisaziun cunvegnenta da l'administraziun federala ed adattescha quella a las relaziuns.
2 El promova la capacitad da prestaziun e d'innovaziun da l'administraziun federala.
3 El surveglia l'administraziun federala permanentamain e sistematicamain.
4 El surveglia confurm a las disposiziuns spezialas las unitads administrativas decentralisadas ed ils purtaders da pensums administrativs da la confederaziun, che n'appartegnan betg a l'administraziun federala.
1 Il cussegl procura per l'execuziun dals decrets e dals ulteriurs conclus da l'administraziun federala.
2 El exequescha la giustia administrativa uschenavant che quella è surdada ad el tras la legislaziun.
1 Il cussegl federal garantescha l'infurmaziun da l'assamblea federala, dals chantuns e da la publicitad.
2 El procura per ina infurmaziun unifurma, a temp e permanenta davart ses giudicament da la situaziun, davart planisaziuns, decisiuns e mesiras preventivas.
3 Resalvadas èn las disposiziuns spezialas per proteger ils interess publics u privats predominants.
Il cussegl federal tgira las relaziuns cun la publicitad e s'infurmescha davart las opiniuns e las dumondas discussiunadas en la publicitad.
1 Il cussegl federal prenda sias decisiuns sco collegi.
2 Ils commembers dal cussegl federal defendan las decisiuns dal collegi.
1 Il cussegl federal prenda las decisiuns da muntada essenziala u da muntada politica suenter ina deliberaziun communabla ed a medem temp.
2 El po exequir las ulteriuras fatschentas cun agid d'ina procedura simplifitgada.
Per preparar las fatschentas da muntada essenziala u da muntada politica definescha il cussegl federala las finamiras tematicas necessarias e fixescha il rom da la deliberaziun.
1 Fatschentas, davart las qualas il cussegl federal ha da concluder, vegnan preschentadas als commembers dal cussegl federal per lur conrapport.
2 La chanzlia federala regla la procedura da conrapport.
1 Il cussegl federal sa raduna uschè savens che las fatschentas pretendan quai.
2 Il cussegl federal vegn convocà dal chancelier federal u da la chanceliera federala sin proposta dal president u da la presidenta da la confederaziun.
3 Mintga commember dal cussegl federal po pretender da tut temp l'execuziun d'ina tractativa.
4 En cas urgents po il president u la presidenta da la confederaziun divergiar da la procedura ordinaria per convocar ed exequir tractativas.
Per deliberar dumondas da gronda muntada exequescha il cussegl federal discussiuns spezialas e dietas en clausura.
1 Il president u la presidenta da la confederaziun maina las tractativas dal cussegl federal.
2 Ultra dals commembers dal cussegl federal fa il chancelier federal u la chanceliera federala part da las tractativas dal cussegl federal e quai cun vusch consultativa. El u ella ha il dretg da far propostas pertutgant las fatschentas da la chanzlia federala.
3 Il vicechancelier e la vicechanceliera fan part da las tractativas, nun ch'il cussegl federal fixeschia insatge auter.
4 Sin proposta dal schef u da la scheffa dal departament cumpetent envida il president u la presidenta da la confederaziun ils secretaris u las secretarias dal stadi, uschenavant che lur champs da lavur èn pertutgads, a las tractativas dal cussegl federal. Quels han vusch consultativa.
5 Sch'i para inditgà al cussegl federal per motivs da sia infurmaziun u sia furmaziun da l'opiniun, envida el a sias tractativas ulteriuras forzas directivas sco er experts d'entaifer e d'ordaifer l'administraziun federala.
1 Il cussegl federal po tractar valaivlamain, sche almain quatter commembers dal cussegl federal èn preschents.
2 El decida cun la pluralitad da las vuschs. Abstenziun da la vusch è permessa; in conclus è valaivel, sch'el obtegna almain la vusch da trais commembers.
3 Il commember dal cussegl federal che ha il presidi vuscha er. En cas d'egualitad da las vuschs dumbra sia vusch duas gia; quai na vala dentant betg en cas d'elecziuns.
1 Commembers dal cussegl federal e las persunas numnadas en l'artitgel 19 prendan recusaziun, sch'els han in interess persunal direct vi d'ina fatschenta.
2 Sch'igl è da prender decisiuns u da decider davart recurs, valan las disposiziuns da recusaziun da la lescha davart la procedura administrativa.
Las tractativas dal cussegl federal e la procedura da conrapport segund l'artitgel 16 n'èn betg publicas. L'infurmaziun sa drizza tenor l'artitgel 11.
Il cussegl federal numna ord ses mez per mintgin da ses commembers in substitut u ina substituta. Resalvà è l'artitgel 37.
1 Il cussegl federal po numnar ord ses mez cumissiuns per tschertas fatschentas. Quellas sa cumponan per regla da trais commembers.
2 Las cumissiuns preparan tractativas e decisiuns dal cussegl federal u mainan per il collegi tractativas cun autras autoritads svizras u estras u cun privats.
Il cussegl federal regla en in'ordinaziun co el ademplescha pli detagliadamain sias funcziuns.
1 Il president u la presidenta da la confederaziun maina il cussegl federal.
2 Il president u la presidenta da la confederaziun:
a. procura ch'il cussegl federal prendia a mauns sias incumbensas a temp, a moda cunvegnenta e coordinada e mainia ellas a buna fin;
b. prepara las tractativas dal cussegl federal ed intermediescha en dumondas dispitaivlas;
c. fa attenziun che la surveglianza dal cussegl federal sur l'administraziun federala vegnia organisada ed exequida a moda cunvegnenta;
d. po da tut temp ordinar examinaziuns da tschertas fatschentas e propona eventualmain al cussegl federal las mesiras adattadas.
1 Il president u la presidenta da la confederaziun ordaina en cas urgents mesiras preventivas.
2 Sch'igl n'è betg pussaivel d'exequir ina tractativa ordinaria u extraordinaria dal cussegl federal, decida empè da lez il president u la presidenta da la confederaziun.
3 Questas decisiuns ston posteriurmain vegnir preschentadas al cussegl federal per l'approvaziun.
4 Il cussegl federal po plinavant autorisar il president u la presidenta da la confederaziun da decider sez fatschentas ch'èn oravant tut da natira formala.
1 Sch'il president u la presidenta da la confederaziun è impedì/da d'exequir sias funcziuns, surpiglia il vicepresident u la vicepresidenta la substituziun ed ademplescha tuttas obligaziuns dal presidi.
2 Il cussegl federal po surdar tschertas cumpetenzas presidialas al vicepresident u a la vicepresidenta.
Il president u la presidenta da la confederaziun represchenta il cussegl federal en Svizra ed en l'exteriur.
Il president u la presidenta da la confederaziun tgira ils contacts da la confederaziun cun ils chantuns en las fatschentas communablas da natira generala.
1 Il chancelier federal u la chanceliera federala è il schef dal stab dal cussegl federal.
2 Il chancelier federal u la chanceliera federala:
a. sustegna il president u la presidenta da la confederaziun ed il cussegl federal tar l'adempliment da lur incumbensas;
b. ademplescha vers l'assamblea federala las incumbensas ch'èn vegnidas adossadas ad el tras la constituziun u tras las leschas.
1 Il chancelier federal u la chanceliera federala dirigia la chanzlia federala ed ha vers quella la medema posiziun sco il schef u la scheffa d'in departament.
2 Ils vicechanceliers u las vicechancelieras substitueschan il chancelier federal u la chanceliera federala.
3 L'organisaziun e la direcziun da la chanzlia federala sa drizzan, cun resalva d'ordinaziuns spezialas dal cussegl federal, tenor las disposiziuns per l'entira administraziun federala, cun excepziun da la part davart ils secretariats generals.
Il chancelier federal u la chanceliera federala:
a. cusseglia e sustegna il president u la presidenta da la confederaziun ed il cussegl federal tar la planisaziun e coordinaziun sin il plaun guvernamental;
b. sbozzescha per il president u la presidenta da la confederaziun ils plans da lavur e da fatschenta e surveglia la realisaziun da quels;
c. cooperescha tar la preparaziun e la deliberaziun da las tractativas dal cussegl federal;
d. prepara en stretga collavuraziun cun ils departaments ils rapports dal cussegl federal a l'assamblea federala davart las directivas da la politica guvernamentala e davart la gestiun dal cussegl federal;
e. cusseglia il president u la presidenta da la confederaziun ed il cussegl federal tar la direcziun cumplessiva da l'administraziun federala e surpiglia funcziuns da surveglianza;
f. sustegna il cussegl federal en sias relaziuns cun l'assamblea federala.
Il chancelier federal u la chanceliera federala procura per la coordinaziun tranter ils departaments.
1 Il chancelier federal u la chanceliera federala prenda en il rom da las disposiziuns dal cussegl federal las mesiras adattadas per infurmar la publicitad.
2 El u ella procura per l'infurmaziun interna tranter il cussegl federal ed ils departaments.
1 Il cussegl federal po engaschar fin diesch secretaris e secretarias dal stadi per sustegnair e distgargiar ils schefs e las scheffas dals departaments.
2 Quels e quellas èn suttames/sas al schef u a la scheffa dal departament cumpetent.
1 Ils schefs e las scheffas dals departaments surdattan als secretaris ed a las secretarias dal stadi funcziuns directivas sin impurtants secturs d'incumbensas dal departament u, sch'il cussegl federal dat ses consentiment, incumbensas interdepartamentalas d'im-purtanza particulara.
2 Ils secretaris e las secretarias dal stadi pon represchentar lur schef u scheffa dal departament tenor las directivas da quel/la.
Ils secretaris e las secretarias dal stadi èn responsabels/blas per las incumbensas surpigliadas vers lur schef u scheffa dal departament.
1 Sin la proposta dal schef u da la scheffa dal departament elegia il cussegl federal ils secretaris e las secretarias dal stadi e fixescha lur funcziuns tenor l'artitgel 37 ali- nea 1.
2 Suenter mintga renovaziun totala dal cussegl federal elegia quel er danovamain ils secretaris e las secretarias dal stadi.
3 Il cussegl federal po tenor l'artitgel 65quinquies da la lescha davart las relaziuns tranter ils cussegls pretender lur conferma tras l'assamblea federala.
1 Il cussegl federal po, sin proposta dal schef u da la scheffa dal departament cumpetent, relaschar ils secretaris e las secretarias dal stadi da tut temp ord lur funcziun.
2 Ils secretaris e las secretarias dal stadi pon da tut temp desister da lur funcziun.
Il cussegl federal regla la relaziun da servetsch dals secretaris e da las secretarias dal stadi.
1 Il cussegl federal ed ils schefs e las scheffas dals departaments dirigian l'administraziun federala.
2 Mintga commember dal cussegl federal maina in departament.
3 Il cussegl federal reparta ils departaments sin ses commembers. Quels èn obligads da surpigliar il departament che vegn surdà ad els.
4 Il cussegl federal po da tut temp reparter danovamain ils departaments.
1 Il cussegl federal ed ils schefs e las scheffas dals departaments fixeschan finamiras e prioritads per l'administraziun federala.
2 Sch'els surdattan l'adempliment direct d'incumbensas ad organisaziuns per projects u ad unitads da l'administraziun federala, dattan els er a quellas las cumpetenzas necessarias ed ils meds necessaris.
3 Els giuditgeschan las prestaziuns da l'administraziun federala ed examineschan periodicamain las finamiras ch'els han dà ad ella.
4 Els dattan gronda attenziun a la tscherna ed a la scolaziun ulteriura dals collavuraturs e da las collavuraturas.
1 Il schef u la scheffa dal departament maina il departament e porta persuenter la responsabladad politica.
2 Il schef u la scheffa dal parlament:
a. fixescha las lingias fundamentalas per la direcziun;
b. surdat, uschenavant che quai è necessari, l'adempliment direct da las incumbensas dal departament a las unitads administrativas sutordinadas ed als collavuraturs ed a las collavuraturas;
c. fixescha l'organisaziun dal departament en il rom da questa lescha.
Entaifer il departament dispona il schef u la scheffa dal departament da princip da dretgs illimitads da dar directivas, da controllar e d'intervegnir persunalmain en ina fatschenta. Resalvadas èn disposiziuns particularas per singulas unitads administrativas u cumpetenzas regladas spezialmain tras la legislaziun federala.
Il schef u la scheffa dal departament po engaschar collavuraturs persunals u collavuraturas persunalas e circumscriver lur incumbensas.
Il schef u la scheffa dal departament prenda en enclegientscha cun la chanzlia federala las mesiras preventivas adattadas per l'infurmaziun davart l'activitad dal departament e fixescha tgi ch'è responsabel per l'infurmaziun.
1 Mintga departament dispona d'in secretariat general sco servetsch da stab general dal departament. A quel pon er vegnir surdadas autras incumbensas da stab.
2 Il secretari general u la secretaria generala è il schef dal stab dal departament.
1 Il secretariat general sustegna il schef u la scheffa dal departament tar la planisaziun, l'organisaziun e coordinaziun da l'activitad dal departament sco er tar decisiuns che cumpetan al schef u a la scheffa dal departament.
2 El ademplescha funcziuns da surveglianza tenor las ordras dal schef u da la scheffa dal departament.
3 El procura che las planisaziuns e las activitads dal departament vegnian coordinadas cun quellas dals auters departaments e dal cussegl federal.
4 El sustegna il schef u la scheffa dal departament tar la preparaziun da las tractativas dal cussegl federal.
1 Ils uffizis èn las unitads purtadras da l'administraziun; els procuran las fatschentas da l'administraziun.
2 Il cussegl federal fixescha cun in'ordinaziun la partiziun da l'administraziun en uffizis. El surdat als uffizis champs da lavur uschè coerents sco pussaivel.
3 Il cussegl federal reparta ils uffizis sin ils departaments tenor criteris da la dirigi- bladad, da la coerenza da las incumbensas sco er da l'equiliber material e politic. El po da tut temp reparter ils uffizis danovamain.
4 Ils schefs e las scheffas dals departaments fixeschan ils princips organisatoris dals uffizis attribuids a lur departaments. Cun il consentiment dal cussegl federal pon els cumpigliar ils uffizis en gruppas.
5 Ils directurs e las directuras dals uffizis fixeschan l'organisaziun detagliada da lur uffizis.
Il cussegl federal po dar incaricas da prestaziun a gruppas ed uffizis determinads e fixar il grad da l'independenza necessaria per quest intent.
Ils directurs e las directuras da las gruppas e dals uffizis èn responsabels vers lur superiurs per la direcziun da las unitads administrativas suttamessas ad els u ad ellas sco er per l'adempliment da las incumbensas surdadas ad els u ad ellas.
1 Mintgamai tenor la muntada d'ina fatschenta decida u il cussegl federal, in departament, ina gruppa u in uffizi.
2 Il cussegl federal fixescha cun in'ordinaziun quala unitad administrativa ch'è cumpetenta per la decisiun en singulas fatschentas u en entirs secturs da fatschenta.
3 Sch'ils departaments na pon betg vegnir perina concernent la cumpetenza en in cas singul, decida il president u la presidenta da la confederaziun.
4 Las unitads administrativas surordinadas ed il cussegl federal pon da tut temp reservar la decisiun da singulas fatschentas per sasez.
5 Resalvadas èn las cumpetenzas ch'èn da resguardar stringentamain tenor la legislaziun davart la giurisdicziun federala. Sch'il recurs al cussegl federal n'è betg admissibel, po il cussegl federal dar las directivas a l'autoritad cumpetenta da l'administraziun federala co i saja da decider confurm a la lescha.
6 Fatschentas van per raschuns da dretg vi sin il departament cumpetent en chaussa, uschenavant ch'igl è da prender decisiuns ch'èn tenor la lescha davart la giurisdic- ziun federala suttamessas al recurs da dretg administrativ al tribunal federal. Il recurs da dretg administrativ cunter decisiuns dal cussegl federal tenor l'artitgel 98 litera a da lezza lescha resta resalvà.
1 Il cussegl federal po surdar la cumpetenza da relaschar normas da dretg als departaments. El resguarda qua la muntada da questas normas da dretg.
2 In transferiment da la legislaziun sin gruppas ed uffizis è be admissibel, sch'ina lescha federala u in conclus federal liant generalmain dat l'autorisaziun latiers.
1 Il schef u la scheffa dal departament po autorisar las suandantas persunas da suttascriver fatschentas determinadas en ses num u per sia incarica:
a. secretaris e secretarias dal stadi;
b. secretaris generals u secretarias generalas u las persunas che substitueschan quels u quellas;
c. commembers da la direcziun da gruppas ed uffizis.
2 L'autorisaziun po er includer la suttascripziun da decisiuns ch'èn suttamessas al recurs da dretg administrativ.
3 Ils directurs e las directuras da las gruppas u dals uffizis reglan l'autorisaziun da suttascriver per lur sectur.
1 Il cussegl federal fixescha ils princips per la tgira da las relaziuns internaziunalas tras l'administraziun federala.
2 Il contact cun las regenzas chantunalas è chaussa dal cussegl federal e dals schefs e da las scheffas dals departaments.
3 Ils directurs e las directuras da las gruppas e dals uffizis han contacts directs cun autras autoritads ed uffizis federals, chantunals e communals sco er cun privats en il rom da lur cumpetenzas.
Ils departaments, las gruppas ed ils uffizis planiseschan lur activitads en il rom da la planisaziun globala dal cussegl federal. Ils departaments dattan conuschent las planisaziuns al cussegl federal.
Il cussegl federal e sias cumissiuns sco er la chanzlia federala liquideschan las incumbensas da coordinaziun surdadas ad els tras la constituziun e las leschas. Els pon surdar quels pensums als secretaris ed a las secretarias dal stadi che s'occupan da quellas chaussas.
1 La conferenza dals secretaris generals dirigia sut la direcziun dal chancelier federal u da la chanceliera federala l'activitad da coordinaziun en l'administraziun federala.
2 Uschè lunsch ch'i n'exista betg in organ da coordinaziun spezial per pensums determinads u per fatschentas determinadas, ademplescha la conferenza sezza incumbensas da coordinaziun, particularmain per preparar fatschentas dal cussegl federal.
3 Ella po tenor conclus dal cussegl federal prender a mauns fatschentas interdepartamentalas e las preparar per mauns dal cussegl federal.
1 La conferenza d'infurmaziun sa cumpona da las persunas da la chanzlia federala e dals departaments ch'èn responsabls per l'infurmaziun.
2 Ella s'occupa da problems actuals d'infurmaziun dals departaments e dal cussegl federal; ella coordinescha e planisescha l'infurmaziun.
3 La persuna da la chanzlia federala ch'è responsbla per l'infurmaziun maina la conferenza.
Il cussegl federal ed ils departaments pon engaschar ulteriurs organs da stab, da planisaziun e da coordinaziun sco conferenzas instituziunalisadas u sco unitads administrativas independentas.
Il cussegl federal po furmar organisaziuns da projects per elavurar impurtantas incumbensas interdepartamentalas ch'èn limitadas temporarmain. Per la direcziun dal project po el engaschar in secretari u ina secretaria dal stadi.
1 Il cussegl federal ed ils departaments pon dumandar cussegls d'organisaziuns e da persunas che n'appartegnan betg a l'administraziun federala.
2 Per las cumissiuns extraparlamentaras relascha il cussegl federal disposiziuns davart la cumposiziun, l'elecziun, las incumbensas e davart la procedura.
La citad da Berna è la sedia uffiziala dal cussegl federal, dals departaments e da la chanzlia federala.
Ils commembers dal cussegl federal ed il chancelier federal u la chanceliera federala pon tscherner libramain lur domicil, els ston dentant pudair cuntanscher en curt temp lur sedia uffiziala.
1 Ils commembers dal cussegl federal, il chancelier federal e la chanceliera federala sco er ils secretaris e las secretarias dal stadi na dastgan betg exequir ni in auter uffizi da la confederaziun, ni in uffizi d'in chantun, ni in'autra professiun ni in mastergn.
2 Els na dastgan er betg avair il post da directurs e directuras u d'administraturs ed administraturas u da commembers da l'administraziun, da l'organ da surveglianza u da l'organ da controlla tar organisaziuns che pratitgeschan in'activitad economica.
1 Parents e quinads en lingia directa e fin e cun il quart grad en la lingia laterala sco er consorts, consorts da soras e consortas da frars na pon betg esser a medem temp commembers dal cussegl federal.
2 Questa regulaziun vala er per secretaris e secretarias dal stadi sco er tranter els, tranter il chancelier federal u la chanceliera federala ed ils commembers dal cussegl federal.
Il cussegl federal po relaschar disposiziuns davart la restituziun d'actas da servetsch da persunas ch'exequeschan ina funcziun publica, che stattan en ina relaziun da servetsch u d'incarica da natira da dretg public u da dretg privat cun la confederaziun u che han abandunà questa relaziun.
1 Leschas ed ordinaziuns dals chantuns èn da suttametter a la confederaziun per l'approvaziun, uschenavant ch'ina lescha federala u in coclus federal liant generalmain prevesa quai. L'approvaziun è premissa per la valaivladad.
2 Ils departaments dattan l'approvaziun. En cas dispitaivels decida il cussegl federal; el po da l'approvaziun cun resalvas.
3 Il cussegl federal è cumpetent per la refusa en cas da leschas ed ordinaziuns, l'assamblea federala en cas da contracts da dretg internaziunal.
La lescha federala dals 19 da settember 1978 davart l'organisaziun e la gestiun dal cussegl federal e da l'organisaziun da l'administraziun federala (lescha davart l'organisaziun da l'administraziun [LOA]) vegn abrogada.
Ils secretaris e las secretarias dal stadi èn inclus/as en la limitaziun da las plazzas (art.2 da la lescha federala dals 4 d'october 1974 davart las mesiras per meglierar las finanzas federalas).
1 Questa lescha è suttamessa al referendum facultativ.
2 Il cussegl federal fixescha la data da l'entrada en vigur.
Annexa
1. La lescha davart la responsabladad vegn midada sco suonda:
Art. 1 al. 1 lit. bbis
1 A las disposiziuns da questa lescha èn suttamessas tuttas persunas, a las qualas igl è vegnì surdà l'execuziun d'in uffizi public da la confederaziun, numnadamain:
bbis. ils secretaris dal stadi;
2. La lescha davart las relaziuns tranter ils cussegls vegn midada sco suonda:
Art. 65 al. 1
1 Ils commembers dal cussegl federal sa pon laschar substituir en cumissiuns parlamentaras tras secretaris dal stadi ed en enclegientscha cun il president da la cumissiun tras lur secretaris generals u tras ils schefs da gruppas ed uffizis.
Art. 65quinquies
1 Ils commembers dal cussegl federal sa pon laschar substituir en las tractativas dals dus cussegls tras secretaris dal stadi, uschenavant che quels vegnan confermads da l'assamblea federala. L'artitgel 65ter alinea 2 vala confurm a ses senn.
2 La conferma succeda per ils secretaris dal stadi ch'il cussegl federal ha menziunà sin ina glista.
3 Sin giavisch da la majoritad d'in cussegl ha il schef dal departament cumpetent da preschentar persunalmain ina fatschenta en quest cussegl.
3. La lescha federala davart la procedura administrativa vegn midada sco suonda:
Art. 47a
C.bis Recurs cunter decisiuns dals uffizis federals
L'emprima instanza per recurs cunter decisiuns dals uffizis federals è il
departament. Excepids èn ils cas:
a. dal recurs da dretg administrativ directamain al tribunal federal (art. 98 lit. c a la fin LOG;
b. dal recurs ad ina instanza speziala (art. 47 al. 1 lit. b);
c. dal recurs cun laschar or il departament (art. 47 al. 2-4);
d. da la decisiun definitiva (art. 46 lit. c e d sco er art. 74 lit. d e c).
4. La lescha federala davart las finanzas da la confederaziun vegn midada sco suonda:
Titel da disposiziun avant l'art. 37
Art. 37 Titel material
Manaschis ed instituts independents
Art. 38a Secturs administrativs cun incumbensas da prestaziun
1 En secturs administrativs per ils quals igl exista ina incumbensa da prestaziun tenor igl artitgel 51 da la lescha davart l'organisaziun da la regenza e da l'administraziun sco er ina contabilitad detagliada da manaschi, po il cussegl federal reglar il rendaquint tenor questa lescha en l'interess d'ina activitad administrativa economica. En quest cas pon las prescripziuns particularas prevair divergenzas dals singuls princips da la contabilitad segund l'artitgel 3 sco er da l'obligaziun da far dumondas per credits posteriurs segund l'artitgel 17.
2 Il rendaquint tenor las prescripziuns particularas furma ina part dal quint dal stadi e dal preventiv federal.
5. La lescha federala dals 4 d'october 1974 davart las mesiras per meglierar las finanzas federalas vegn midada sco suonda:
Art. 2a Titel material ed al. 2
Excepziuns
2 Il cussegl federal po relaschar or da la limitaziun da plazzas secturs, per ils quals existan ina incumbensa da prestaziun segund l'artitgel 51 da la lescha davart l'organisaziun da la regenza e da l'administraziun sco er prescripziuns particularas per il rendaquint segund l'artitgel 38a da la lescha davart las finanzas dals 6 d'october 1989.