Suenter mintga renovaziun totala dal Cussegl naziunal ha lieu er ina renovaziun totala dal Cussegl federal. Las commembras ed ils commembers dal Cussegl federal vegnan elegids da l'Assamblea federala plenara per ina perioda d'uffizi da quatter onns. Durant la perioda d'uffizi na po la cussegliera federala u il cusseglier federal betg vegnir cupitgà tras in votum da disfidanza.

Las commembras ed ils commembers dal Cussegl federal, la presidenta u il president da la Confederaziun, la vicepresidenta u il vicepresident dal Cussegl federal sco er la chanceliera federala u il chancelier federal vegnan elegids in per in. Ina candidata u in candidat è elegì, sch'ella u sch'el ha survegnì dapli che la mesadad da las vuschs (maioritad absoluta). Las commembras ed ils commembers dal Cussegl federal en uffizi vegnan reelegids en l'urden da lur vegliadetgna d'uffizi.