Cun il messadi davart la planisaziun da la legislatura (LParl art. 146) preschenta il Cussegl federal dapi l'onn 1968 mintgamai sia strategia politica al parlament ch'è vegnì elegì da nov. En quel fixescha el las finamiras e las mesiras las pli impurtantas per la nova perioda da legislatura. Dapi il 1. da december 2003 po il parlament midar questa planisaziun e dar directivas concretas al Cussegl federal (LParl art. 147). En il sistem da concordanza da la Svizra na po in tal program da la regenza dentant betg esser la realisaziun d'in program da partida u da coaliziun, sco che quai è il cas en noss pajais vischins. Anzi, la planisaziun da la legislatura è in instrument dal dialog tranter il Cussegl federal ed il parlament che duai mussar ad ura, tge intenziuns che la regenza ha e nua ch'ins po far quint cun il sustegn da las duas chombras u quant enavant ch'ins sto far quint cun resistenza u nua ch'ins sto far adattaziuns.