Curriculum vitae da cusseglier federal Ueli Maurer

Ueli Maurer è naschì il 1. da december 1950 sco burgais dad Adelboden (BE) e Hinwil (ZH). El è maridà ed ha sis uffants cun las annadas 1978-1997.

Suenter las scolas primaras e secundaras a Hinwil ed in emprendissadi commerzial ha Ueli Maurer cumplettà sia scolaziun cun divers curs.

En sia professiun è el stà collià da l'entschatta cun l'agricultura e cun il commerzi. Dal 1974 al 1994 ha el manà sco gestiunari ina cooperativa agricula. Dal 1994 al 2008 ha el manà l'Uniun purila da Turitg. L'onn 2008 è el vegnì elegì sco president da l'Associaziun svizra dals producents da verdura. Ultra da quai era el activ sco mastergnant independent en la branscha da communicaziun.

La carriera politica dad Ueli Maurer ha cumenzà l'onn 1978 cun sia elecziun en il cussegl communal da Hinwil. Dal 1983 è el vegnì elegì en il parlament chantunal da Turitg. Il 1991 è el vegnì elegì en il Cussegl naziunal. Dal 1995 al 1996 ha el presidià la Cumissiun da gestiun. Dal 1995 al 2003 è el stà commember da la Cumissiun per ambient, planisaziun dal territori ed energia. A partir dal 2003 s'è el engaschà sco commember da la Cumissiun da finanzas ed a partir dal 2007 en la Cumissiun per segirezza sociala e sanadad. Dal 1996 al 2008 ha el presidià la Partida populara svizra PPS.

Ils 10 da december 2008 è Ueli Maurer vegnì elegì en il Cussegl federal. El maina il Departament federal per defensiun, protecziun da la populaziun e sport DDPS.

En il militar ha el l'ultim manà in battagliun da velocipedists.