Valitar la situaziun, fixar las finamiras ed ils meds da la politica guvernamentala, circumscriver las strategias da l'agir dal stadi, garantir la planisaziun e la coordinaziun sin il plaun guvernativ, promover la coesiun dal pajais, represchentar la Confederaziun vers anen e vers anora.

Organisar e manar ils departaments en moda adequata ed effizienta.

Procedura preliminara da la legislaziun: Elavurar sbozs per midadas da la constituziun, per leschas federalas e per conclus federals per mauns da l'Assamblea federala. Relaschar ordinaziuns.

Exequir ils conclus da l'Assamblea federala. Tractar recurs cunter decisiuns dals departaments u cunter disposiziuns dals chantuns.

Infurmar a temp e cuntinuantamain davart las valitaziuns da la situaziun, davart las planisaziuns, davart las decisiuns e davart las mesiras dal Cussegl federal.

Il Cussegl federal ha per regla ina sesida ordinaria per emna; en quest connex decida el mintg'onn davart 2000 fin 2500 affars. Ultra da las sesidas extraordinarias che vegnan – tut tenor il basegn – ordinadas a curt termin vegnan mintga onn vitiers pliras sesidas da clausura ch'èn mintgamai reservadas per tractar tematicas spezialas e grondas. Las sesidas dal Cussegl federal maina la presidenta u il president da la Confederaziun. Ellas duran tranter 1 ura e 10 uras.

Ils departaments e la Chanzlia federala preparan ils affars, il Cussegl federal decida dentant sco colleghi. En quest connex ha mintga commembra e mintga commember ina vusch; la chanceliera federala u il chancelier federal ha il dretg da far propostas e da discurrer, dentant betg il dretg da votar.