Dapi la fundaziun dal stadi federal l'onn 1848 fa il cussegl federal mintga onn in rapport da gestiun per mauns dal parlament. Questa obligaziun è reglada en la constituziun federala (CF art. 187 al. 1 lit. b). Quest reporting aveva l'emprim il caracter d'in rapport da lavur. Dapi ils onns 1960 è vegnì rapportà surtut er da la realisaziun dals puncts da la planisaziun da la legislatura. Cun la reordinaziun da l'onn 1995 è quest reporting vegnì concepì sco ina cumparegliaziun annuala da la situaziun effectiva e da la situaziun previsa. Dapi lura orientescha il rapport da gestiun annual dal cussegl federal davart ils puncts centrals da l'activitad dal cussegl federal e davart l'adempliment da las finamiras annualas. Divergenzas da las finamiras annualas e projects nunplanisads vegnan er preschentads e motivads. Dapi il 1. da december 2003 è quest proceder francà en la lescha davart il parlament (LParl art. 144).