Las lavurs preparativas cumenzan ditg avant che la fotografia vegn publitgada. La stad contactescha la Chanzlia federala il departament da la presidenta futura u dal president futur per coordinar ils emprims pass. Il pli impurtant è la tscherna dal lieu: Nua duai la fotografia vegnir realisada? Savens vegn lavurà en ils conturns da la stanza dal Cussegl federal. Per l’ina ha quest lieu ina tscherta dignitad, per l’autra dovra quai il pli pauc temp. La fotografia sto vegnir realisada entaifer ina sesida dal Cussegl federal e tut ensemen, inclusiv ils purtrets individuals, na dastga betg durar dapli che 45 minutas. Sco segund pass vegn planisada la cumposiziun da la fotografia, la fin e finala è quai la decisiun da la presidenta futura u dal president futur. Cur cha la cumposiziun dal purtret è decisa datti diversas fotografias d’emprova cun statistas e statists. Questas fotografias ston sumegliar tant che pussaivel a la fotografia definitiva planisada.

Ils 7 da december 2012, las 08.45h: En la Chasa federala vest è tut pront per realisar la fotografia dal Cussegl federal 2013. Ils commembers dal Cussegl federal e la chanceliera federala arrivan. Dar si la sminca, baiver in café, ina curta baterlada, in sguard en la gasetta e lura vegn spert fatga la fotografia individuala. E pauc suenter vegn fatga la fotografia in corpore. Il fotograf e las stylistas provan da crear ina atmosfera divertenta. Acziun! Ina gronda apparatura dat sajettas e sajettas, l’entir set vegn illuminà perfetgamain. Vi dal monitur controllescha il fotograf las fotografias. Suenter in pèr minutas è la fotografia fatga, la sesida dal Cussegl federal po entschaiver.

La fotografia dal Cussegl federal è fitg populara. Ella vegn stampada 60’000 giadas. L’entschatta da mintg’onn spetgan la populaziun, collecturas e collecturs e las medias sin la fotografia. E lura suondan quasi sco ritual obligatoric da Bumaun tut ils commentaris davart la fotografia.